माझी डॉक्टरकी : गंभीर आणि गमतीदार

जात-पात-धर्माच्या नावाखाली आपल्या देशात प्रचंड संघर्ष, बेबनाव दिसतो आहे. अशा वेळी विनोबाजींच्या 'स्वधर्म' कल्पनेचा विचार डॉक्टरांनी करणं गरजेचं ठरतं. मी जिथे आहे, तिथल्या वंचित, गरजूंची सेवा करणे हाच माझा धर्म ! आज आपण चंद्रावर, मंगळावर जाण्याचे स्वप्न बघतो, ते वास्तवात उतरतही आहे; पण गरिबांच्या खेड्यात, आदिवासींच्या पाड्यात मोठ्यांना, लहानांना व सर्वांनाच साध्या प्राथमिक आरोग्यसेवा मिळत नाहीत. नेमेची येतो पावसाळा प्रमाणे ह्या गावांत बालमृत्यू, कुपोषण, साथरोग, मातामृत्यू घडतच आहेत. अलकाताईचं 'माझी डॉक्टरकी' हे पुस्तक तरुण डॉक्टरांना नवसंजीवनी देण्याचं काम करेल व खेड्याकडे जाण्यासाठी निश्चितच प्रोत्साहित करेल, अशी मला आशा नव्हे, खात्री आहे. अनुभव मांडताना जिवंतपणासोबतच अलकाताईचा प्रामाणिकपणा खूप भावतो. स्वतःच्या भाव-भावना, वाट्याला आलेले अपमान, उपहास, त्यांचा सात्त्विक संताप व केविलवाणी धडपड हे सर्वच अतिरेक न करता सहज मांडलेलं आहे. त्यामुळे ते कृत्रिम न वाटता जीवनानुभवांचं खरं वर्णन वाटतं. म्हणूनच ह्या पुस्तकाचा इतर भाषेत अनुवाद व्हावा, तसेच वैद्यकीय क्षेत्रातल्या सर्वांनीच व सर्वसाधारण लोकांनीपण हे पुस्तक वाचावं. पद्मश्री डॉ. राणी बंग (संस्थापक संचालक, 'सर्च', गडचिरोली)