सृजन प्रकाशन

साहित्य समाजाला नव्याने पाहण्याची दृष्टी देऊ शकते, विचारांना चालना देऊ शकते आणि परिवर्तनाची प्रेरणा निर्माण करू शकते, या भूमिकेतून सृजनची वाटचाल सुरू झाली. मुख्य प्रवाहात तुलनेने कमी स्थान मिळणारे सामाजिक, सांस्कृतिक, ऐतिहासिक, राजकीय आणि परिवर्तनवादी विषय केंद्रस्थानी आणण्याचा सातत्यपूर्ण प्रयत्न आम्ही केला आहे. 'सृजन' या त्रैमासिकासोबतच आम्ही विविध वैचारिक, ललित आणि संदर्भग्रंथ प्रकाशित केले आहेत. नव्या लेखकांना मंच उपलब्ध करून देणे, दर्जेदार मराठी वाचनसंस्कृती समृद्ध करणे आणि विचारप्रधान लेखन अधिकाधिक वाचकांपर्यंत पोहोचवणे, ही आमची कार्यदिशा आहे. प्रकाशन हा केवळ व्यावसायिक व्यवहार नसून सामाजिक आणि सांस्कृतिक जबाबदारी आहे. म्हणूनच विवेक, समता, मानवी मूल्ये आणि चिकित्सक विचार यांना बळ देणारे साहित्य प्रकाशित करण्यावर आमचा भर राहिला आहे. जनप्रबोधनाची परंपरा जपत समकालीन प्रश्नांवर अर्थपूर्ण संवाद घडवून आणणे, हे आमचे ध्येय आहे.